Voldaan

Voldaan

Kronenberg 3 (zon)

2 - 2

SSA S.V. Lottum - GFC'33 6 (zon)

Competitie

Groep 4 063

Datum

11 september 2022 10:30

Scheidsrechter

J. Tielen

Accommodatie

Sportpark De Heesbergen
Meerweg 71
5976NS
KRONENBERG
tel. 077-4672723

Goojendaag fijne minsen, goan d’r maar weer ens good veur zitten, want weej hebben zondaag weer unne interessante pot gespeuld, oftewal, dit get weer un lang verslaag weare. Auk deze weak hadden we weer verschillende speulers die te laat waren, wao de eine zien appjes neet leest en dus op de verkierde locatie steit, mot de andere oet bed getakeld weare door zien teamgenoten. De trainer is d’r in idder geval alweer hartstikke klaor mei en de volgende dea te laat kump mot unne duit in ut zekske veur ut teamuitje doon. Volgende weak huurt ge of dit genog motivatie is veur os jonge goden um op tied te komen.

Als ierste zal ik misschien unne enkeling van och wat zurg wegnemen, mocht ge och zondaagmorgen toevallig in Kroenenberg hebben bevonden (gen idee wasse dao zous willen gaon doon, ma goed) en ut luchtalarm gehuurd hebben, genne paniek. Det luchtalarm waas namelijk neet umdet de Russen inens in Kroenenberg stonden, nea det luchtalarm waas ut teiken det de baore oet Kroenenberg urre trekker richting ut voetbalveld moosten steuren veur unne wedstrijd. Zodoende speulde we oeteindelijk neet teage Kroenenberg 3, maar teage Kroenenberg twie en un half, want ut waar unne mix van 2 en 3 en op schoel hebben ze mich oeit gelierd desse den op twie en un half oetkums.

Onderweag nao de Kroenenberg mochten weej zelfs nog en lokaal vervoersmiddel aanschouwen, un peerd met wagen d’r achter, waanzinnig. Einmoal de wereldreis nao Kroenenberg voltooid moosten we rap umkleije en door nao de warming up. Echter moosten sommige van os ierst ff eure maaginhoud deponeren veur dette koos beginnen.

Rond de klok van half elluf floot de scheidsie veur d’n aaftrap. Ut veld wao det op gebeurde waas volgens mich al un jaor nea mier gemeijd, ma goed, niks aan te doon. Al vreej snel werd duudelijk det os jonge goden de aovund d’r veur en prachtig fiëstje hadden gehad beej Voldaan. Dao mei bedoelde ik neet det we euverdreve slecht speulden, ma ut waas ut allemaol net neet zeg ma. We motte zo’n half eurke onderweag zien gewes in de wedstrijd wie de Kroenenberg unne vreeje trap kreeg op un paar meater van os zestien meater gebied. De maor werd good gepositioneerd, maar zich zelf good positioneren en vervolgens adekwaat reageren werd un bietje vergeate door Sven en zoe keken we teage unne achterstand aan van 1-0. Op zich zette we dao zelf redelijk wat dreiging teageneuver, maar zoe als al ierder gezag waas ut ut allemaol net neet. Ik zal och ter verduudelijking ens n klein lieske geave met dingen die allemaol net neet waren. In de goal van Kroenenberg scheten vanaaf 7 meater aafstand, euver ut vangnet. 1 op 1 met de keeper, recht op de keeper zelf scheten. Et cetera, et cetera, zoe kinnen we nog wal effe doorgaon.

Kort gezag, met dea 1-0 achterstand gingen we ok de rust in. En de rust waas dit kier auk ens echt rust. De trainer had gisteraovund namelijk auk de boojem van ut vaat gevonden op Voldaan dus dea had ga genne energie um boos te weare. D’r werd un enkele kleine tactische wijziging doorgevoerd, maar det waas ut dan ok. Dus dao mei weej weer teruuk de wei in um te proberen in de twiede helft ozze achterstand weg te werken. Ik kin och alvas verklappen, det is os ok nog gelokken ok, maar van harte ging ut neet. Ut aantal kansen det we nuudig hadden um uberhaupt geliek te kommen met Kroenenberg waas nea op twiej handen te tellen, maar oeteindelijk lukte ut Job wal um ut net te vinden en kwamen we op gelieke hoegte, 1-1. Dao mei is Job auk metein de topscorer op dit moment van ut Vlaggenschip.

Einige tied later besloot auk gastspeuler Frens det ut tied waas um ens raak te scheten in plaats van allein ma te missen en zoe teikende hea veur de 1-2. Frens vond det dao mei zien taak d’r op zoot veur vandaag en leet zich metein wisselen. Helaas mochten we amper 5 tot 10 minuten genieten van ozze veursprong, want toen kopte d’r eine van Kroenenberg raak, 2-2, en dao mei stond auk de eindstand vast. Ondertussen waas de sfeer gedurende de twiede helft steeds grimmiger gewaore met dank aan de scheidsie. Helaas vergoot dea vaak det de wedstrijd door twie partieje gespeuld werd, ma goed auk dea mins kin unne kier nea ziene daag hebben. Al bin ik wal bang det zelfs Specsavers en Pearle niks mier veur m kinnen beteikene.

Al met al duit det natuurlijks niks aaf van de honderd miljoen miljard kansen die we zelf gemist hebben. Desondanks haope we det ut aafgereisde publiek toch nog un bietje heat genaote van os kunsten, bedankt veur ut komme kieken. Verder auk un woord van dank aan Frens en Roel veur ut oethelpen van ozze Mannschaft. Ohja, man of the match waas deze kier Dylano Stappers, gooje pot gespeuld jong, weej zien blie det d’r gen scouts langs de lien stonden. Volgende weak speulen we de letste beakerwedstried op de velden in Grubbenvorst teage Hegga 4. Dus kom volgende weak lekker kieke op diene vreej zondaagmorgen beej sportpark D’n Haspel, beej zien is meimaken.

En zoe als altied: De heer zij met u en met uw geest, Amen!

Delen

voeg je eigen gadgets toe aan deze pagina!